Binəqədidə yarımilliyin yekunlarına həsr olunmuş iclas keçirilib - FOTO

Binəqədi Rayon İcra Hakimiyyəti başçısı yanında Şuranın Azərbaycan Respublikasının Prezidenti İlham Əliyevin sədrliyi ilə Nazirlər Kabinetinin 2011-ci ilin I yarısının sosial-iqtisadi inkişafının yekunlarına həsr olunmuş iclasında irəli sürülmüş vəzifələrlə bağlı və rayonun sosial-iqtisadi inkişafının 2011-ci ilin I yarısının yekunları və qarşıda duran vəzifələrə həsr edilmiş geniş iclası keçirilib.

Bu barədə Lent-az-a Rayon İcra Hakimiyyəti Başçısı Aparatının ictimai təşkilatlar və siyasi partiyalarla iş şöbəsinin müdiri Natiq Əliyev məlumat verib. Onun bildirdiyinə görə, rayonun idarə, müəssisə və təşkilatlarının rəhbərlərinin, eləcə də ictimaiyyətin fəal nümayəndələrinin iştirakı ilə keçirilən iclası giriş sözü ilə açan RİH başçısı Alı Qocayev 2011-ci ilin I yarımilliyində ölkənin sosial-iqtisadi inkişafında əldə edilmiş uğurlardan danışıb.

RİH başçısının I müavini Fizuli Aslanov 2011-ci ilin birinci yarısında rayonun sosial-iqtisadi inkişafı istiqamətində görülən işlər və qarşıda duran vəzifələr haqqında məruzə ilə çıxış edib.

Məruzə ətrafında çıxış edən digər natiqlər – Biləcəri bələdiyyəsinin sədri İlham Xəlilov, Rayon Mənzil Kommunal Təsərrüfatı Birliyinin rəisi Rəşad Yusifov və “El” kompaniyasının sədri Tofiq Əliyev hesabat dövründə ölkə üzrə əldə olunmuş uğurları, Prezident İlham Əliyevin respublikamızın sosial-iqtisadi inkişafının daha da sürətləndirilməsi istiqamətində həyata keçirdiyi siyasəti yüksək qiymətləndiriblər.

Sonda Azərbaycan Milli Mətbuatının yaradılmasının 136-cı ildönümü münasibətilə və rayonun sosial-iqtisadi, ictimai-mədəni həyatını müntəzəm olaraq, KİV səhifələrində işıqlandırdığına görə bir qrup jurnalistə RİH başçısının qiymətli hədiyyələri təqdim edilib.