Keşişlər əhalini “SOCAR-Georgia”dan benzin almamağa çağırır

“Azərbaycan sizə benzin satıb, pulunuzla gürcü torpaqlarında məscidlər tikdirir”

Bolnisinin Faxralı kəndində qədim məscid binasının bərpasına etiraz edən keşişlər rayon mərkəzində ARDNŞ-in törəmə müəssisəsi olan “SOCAR-Georgia”ya məxsus yanacaqdoldurma məntəqəsi yaxınlığında aksiya keçiriblər.

APA-nın Gürcüstan bürosunun məlumatına görə, keşişlər əllərində “SOCAR-Georgia”dan benzin alma!” sözləri yazılmış şüarlar tutublar. Benzin doldurmaq üçün məntəqəyə gələn gürcü sürücüləri bundan çəkindirməyə çalışan keşişlər bildiriblər ki, “SOCAR-Georgia” məntəqələrindən alınan benzinə görə ödənilən hər qəpik Gürcüstanın maraqlarına qarşı istifadə olunur.

Onlar “SOCAR-Georgia”nın gürcülərə benzin satmaqdan əldə etdiyi qazanc hesabına “gürcü torpaqlarında” məscidlər tikdirdiyini bildiriblər. Dünən axşam analoji aksiya paytaxt Tiflisdə və “SOCAR-Georgia”ya məxsus benzindoldurma məntəqələri yerləşən digər rayonlarda da keçirilib.