Şeyxdən dindarlara dəstək

Allahşükür Paşazadə “Fatimeyi-Zəhra” məscidinin sökülməsinin doğru olmadığını deyib

Qafqaz Müsəlmanları İdarəsinin sədri, Şeyxülislam Allahşükür Paşazadə Bakıdakı “Fatimeyi-Zəhra” məscidinin sökülməsi ilə bağlı narahatlığa münasibət bildirib. Məsələ ilə bağlı bir neçə yerdən, o cümlədən məscid icmasından müraciət aldığını xatırladan Hacı Allahşükür Paşazadə heç bir halda Allah evinin sökülməsinə müsbət baxmadığını ifadə edib.

Bu barədə Dini Etiqad və Vicdan Azadlıqlarını Müdafiə Mərkəzinin (DEVAMM) rəhbəri Hacı İlqar İbrahimoğlu Lent.az-a açıqlamasında məlumat verib. Onun sözlərinə görə, sentyabrın 1-də mətbuat vasitəsilə şeyxə müraciət edərək “Fatimeyi-Zəhra” məscidinin taleyinə biganə qalmamağa çağırıb: “Aradan təxminən bir həftə keçəndən sonra cavab gəlib və bu cavab bizi qane edir. Çünki orada bildirilir ki, şeyxülislam mənim və ölkə dindarlarının narahatlığını bölüşür. O, hətta cümə xütbəsini bütünlükdə bu məsələyə həsr etdiyini və istənilən halda məscid sökülməsinin əleyhinə olduğunu deyib”.

Hacı İlqar İbrahimoğlu şeyxülislamın bu cavabının “Fatimeyi-Zəhra” məscidinin taleyində mühüm rol oynayacağı qənaətindədir. Onun sözlərinə görə, Hacı Allahşükür Paşazadə bu məsələyə hətta “bəzi məscidlər qanunsuz tikilibsə belə, dindarlara yox, dinə və Allaha xatir onlar qanuniləşdirilməlidir, bundan ötəri məscidləri sökməyə ehtiyac yoxdur” şəklində münasibət bildirib.

Elxan SALAHOV