Hərbiyönümlü QHT Koalisiyası bəyanat yayıb

Koalisiya ordu haqqında neqativ məzmunlu əsassız məlumatların yayılmasını pisləyib

Hərbiyönümlü QHT Koalisiyası bir qrup şəxsin mətbuat orqanlarına ordu haqqında neqativ məzmunlu əsassız məlumatlar ötürməsini pisləyib.

Lent.az-a Hərbiyönümlü QHT Koalisiyasından daxil olan bəyanatda bildirilir ki, hər dəfə eyni şəxslərin dilindən səslənən qeyri-obyektiv fikirlər həqiqəti əks etdirməsə də, ictimaiyyəti çaşdırmaq baxımından ziyanlıdır.

Bəyanatda vurğulanır ki, Azərbaycan ordusuna qərəzli yanaşmaq, şəxsi mənafe baxımından münasibət bəsləmək, bu məzmunda materialları mətbuata çıxarmaq yolverilməzdir və belə addımların hələ də müharibə vəziyyətində, torpaqlarının xeyli hissəsi işğal altında olan bir ölkədə atılması acınacaqlı haldır.

Koalisiyanın bəyanatında ictimaiyyətə, xüsusən KİV-ə ordu ilə bağlı məsələlərdə daha diqqətli olmaq çağırışı ünvanlanıb.