İmtahan sualları əvvəlcədən hazırdır

Vergi orqanlarında işləmək istəyənlər bazar günü test imtahanı verməlidir

Avqustun 30-da vergi orqanlarında işləmək istəyənlər üçün test imtahanları keçiriləcək. Tələbə Qəbulu üzrə Dövlət Komissiyasının Vergilər Nazirliyi ilə birgə təşkil etdiyi imtahanlara hazırlıq prosesi artıq başa çatıb.

Vergilər Nazirliyindən Lent.az-a bildiriblər ki, namizədlərin imtahana hazırlaşmalarına kömək məqsədilə 2529 sualdan ibarət test toplusu çap olunub. Namizədlər həmin kitabçalardan istifadə etməklə imtahanda müvəffəqiyyət qazanmaq şanslarını artıra bilərlər.

Nazirlikdə bildirirlər ki, imtahanda namizədlərə müvafiq sahə bilikləri üzrə (hüquq və ixtisas) təqdim olunacaq 80 sual məhz həmin sual bankından seçiləcək. Suallar Azərbaycan Respublikasının Konstitusiyası, prezidentin fərmanları, Nazirlər Kabinetinin qərarları, habelə Vergi Məcəlləsi, Әmək Məcəlləsi, İnzibati Xətalar Məcəlləsi, Mülki Prosessual Məcəllə, Mülki Məcəllə, Cinayət Məcəlləsi və Cinayət Prosessual Məcəlləsi və digər qanunvericilik aktlarını əhatə edəcək.

Çap olunmuş test toplusunu yalnız Tələbə Qəbulu Üzrə Dövlət Komissiyasının İnzibati binasından almaq olar.

Elxan SALAHOV