Allahşükür Paşazadə: “Həcc ziyarəti təxirə salınmayacaq”

“Səudiyyə Ərəbistanı bütün hacıları qəbul edəcək”

““Donuz qripi”nə görə Həcc ziyarətinin təxirə salınacağı barədə söhbətlərlə əlaqədar Səudiyyə Ərəbistanı Həcc Nazirliyinin nümayəndəsi ilə danışdım. O, təkidlə bildirdi ki, bu söz-söhbət şişirdilib. Səudiyyə Ərəbistanı bütün hacıları qəbul edəcək və hər şey yaxşı olacaq”.

Bu sözləri dini liderlərin Qazaxıstanda keçirilən forumunda iştirak edən Qafqaz Müsəlmanları İdarəsinin sədri, şeyxülislam Allahşükür Paşazadə APA-nın müxbirinə açıqlamasında deyib.

O, Nursultan Nazarbayevlə görüşdüyünü və Qazaxıstan prezidentinin yaxın vaxtlarda Azərbaycana səfər edəcəyini söyləyib. A. Paşazadə 1991-ci il noyabrın 20-də Dağlıq Qarabağda baş verən vertolyot qəzasında qazaxıstanlı polkovnikin həlak olduğunu xatırladaraq bildirib ki, Qazaxıstan da Qarabağ uğrunda şəhid verib: “Nazarbayevin Azərbaycana dostluq, qardaşlıq münasibəti var. Ümid edirik ki, bu cür dini dialoqlar dünyadakı bir çox problemin, o cümlədən Qarabağ probleminin həlli işində siyasətçilərə kömək edə bilər”.