3 məktəb barədə Korrupsiyaya Qarşı Mübarizə İdarəsinə məktub göndərilib

İki ayda Təhsil Nazirliyinin “Qaynar xətt”inə daxil olmuş 69 müraciətin 28-i Bakı məktəblərindəndir

Bu ilin aprel və may aylarında Təhsil Nazirliyinin “Qaynar xətt” xidmətinə 69 müraciət daxil olub. Müraciətlərdən 5-i sorğu xarakterlidir.

Nazirliyin mətbuat xidmətindən Lent.az-a bildiriblər ki, müraciətlərin böyük əksəriyyəti ümumtəhsil məktəbləri ilə bağlıdır. Belə ki, Bakı şəhər ümumtəhsil məktəblərindən 28, Gəncə şəhər ümumtəhsil məktəblərindən 5, Abşeron rayonundan 6, Yardımlı rayonundan 3 müraciət daxil olub.

“Qaynar xətt” xidmətinə daxil olmuş müraciətlərdən 6-sı ali təhsil müəssisələrinə aiddir. Onların 3-ü Azərbaycan Beynəlxalq Universiteti ilə əlaqədardır. Bu müraciətlərdə diplom alınması, diplomun səhv yazılması, tələbələrin akademik borclarının ləğvi və digər məsələlərdən bəhs edilir.

Ötən iki ayda “Qaynar xətt” xidmətinə daxil olan müraciətlərdən 3-ü (Gəncə şəhəri üzrə 2, Abşeron rayonu üzrə 1) Azərbaycan Respublikası Baş Prokuroru yanında Korrupsiyaya qarşı Mübarizə İdarəsinə göndərilib.

Nazirlikdə bildirirlər ki, “Qaynar xətt”ə daxil olan müraciətlər əsasında təhsil prosesinin təşkili, xaricdə təhsil, müəllimlərin ezamiyyə xərclərinin ödənilməsi, IX və XI siniflərin buraxılış imtahanları, təhsil sənədlərinin alınması və digər məsələlərlə bağlı bütün müraciətlər araşdırılıb. Bu araşdırmaların nəticələrinə uyğun müvafiq tədbirlər görülüb və vətəndaşlara cavab verilib.

Elxan SALAHOV