Pensiyaçılara pulsuz bukletlər paylanacaq
25 may 2009 10:45 (UTC +04:00)

Pensiyaçılara pulsuz bukletlər paylanacaq

Sığortaolunan və pensiyaçılar üçün maarifləndirici çap məhsulları hazırlanıb

Dövlət Sosial Müdafiə Fondu sığorta-pensiya sistemində həyata keçirilən islahatlarla bağlı sığortaolunan və pensiyaçıların maarifləndirilməsi üçün yeni çap məhsulları hazırlayıb. Məqsəd ictimaiyyətin əmək pensiyası, məcburi dövlət sosial sığorta haqları və fərdi uçotla bağlı daha da ətraflı məlumatlandırmaqdır.

Fondun mətbuat xidmətinin rəhbəri Elman Babayev Lent.az-a bildirib ki, bukletlər 5 adda – “Gələcəyə arxayınlıqla aparan yol (sosial sığorta və pensiya təminatı)”, “Gələcəyə arxayınlıqla aparan yol (sosial sığorta və fərdi uçot)”, “Pensiyaçılar üçün bankomat təlimatı”, “Mərkəzi Çağrı Sistemi:190”, “Sosial sığorta haqlarının vaxtında ödənilməsi gələcəyinizin təminatıdır” çap olunub və əhaliyə pulsuz paylanır.

Elman Babayev bildirib ki, bu bukletlər prezident İlham Əliyevin imzaladığı 30 dekabr 2008-ci il tarixli “2009-2015-ci illərdə Azərbaycan Respublikasında sığorta-pensiya sisteminin inkişafına dair Dövlət Proqramı” çərçivəsində hazırlanıb. Onun sözlərinə görə, həmin proqramda pensiya-sığorta sahəsində əhalinin maarifləndirilməsi ilə bağlı tədbirlərin görülməsini xüsusi müddəa var. Proqrama əsasən, sığorta-pensiya sahəsində əhalinin maarifləndirilməsi məqsədi ilə davamlı olaraq müvafiq tədbirlər görülməlidir.

Elxan SALAHOV
# 674

Oxşar yazılar