QHT-lərə Dövlət Dəstəyi Şurası və “Counterpart İnternational” birgə layihələr həyata keçirəcək
21 may 2009 18:30 (UTC +04:00)

QHT-lərə Dövlət Dəstəyi Şurası və “Counterpart İnternational” birgə layihələr həyata keçirəcək

Bakıda keçiriləcək beynəlxalq konfransa hazırlıq məsələləri müzakirə olunub

Bu gün Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının sədri, Milli Məclisin deputatı Azay Quliyev Azərbaycanda fəaliyyət göstərən Counterpart İnternational Təşkilatının ölkə üzrə rəhbəri Maykl Kunzla görüşüb.

Şuradan Lent.az-a verilən məlumata görə, ikitərəfli görüşdə bu il noyabr ayının əvvəllərində “Vətəndaş cəmiyyətinin inkişafı: qazanılmış təcrübə və yeni çağırışlar” mövzusunda Bakıda keçirilməsi planlaşdırılan beynəlxalq konfransa hazırlıq məsələləri müzakirə edilib. Həmçinin, Şura ilə Counterpart İnternational Təşkilatının əməkdaşlıq əlaqələrinin genişləndirilməsi və birgə layihələrin reallaşdırılması da qərara alınıb.

Müzakirələr nəticəsində konfransa hazırlıq üçün Şura və Counterpart İnternational Təşkilatının əməkdaşlarından ibarət işçi qrup yaradılıb və məsələ üzrə Anlaşma memorandumunun hazırlanması həmin qrupa tapşırılıb. Qərara alınıb ki, yaxın günlərdə təşkilat rəhbərləri yenidən görüşüb, konfransa hazırlıq işlərinin gedişini müzakirə etsinlər.

Görüş iştirakçıları Bakıda Beynəlxalq QHT Məktəbinin açılması məsələsi ətrafında da fikir mübadiləsi aparıblar.
# 937

Oxşar yazılar