Bakının mərkəzində su xətti partlayıb

Paytaxtın Nəsimi və Səbayel rayonlarının bir hissəsini içməli su il təmin edən magistral boru kəməri partlayıb.

Lent.az-ın məlumatına görə, hadisə “Azadlıq” prospektində, metronun “28 May” stansiyası yaxınlığında baş verib. Gecə saatlarında 500 millimetrlik borunun partlaması nəticəsində yüksək təzyiqli su ətrafa yayılıb. Bir qədər əvvəl hadisə yerinə yollanan əməkdaşımız suyun “Azadlıq” prospekti boyunca ətrafa yayıldığının şahidi olub. Borunun partlaması prospekt boyunca avtomobillərin hərəkətinə mane olmasa da, piyadaların hərəkəti xeyli çətinləşib. Hazırda metronun “28 May” stansiyası yaxınlığından başlayaraq “Azadlıq” prospekti və prospektlə kəsişən küçələrin bir hissəsi çirkli suya və lilə qərq olub.

Şahidlərin bildirdiyinə görə, yalnız bərpa işləri aparan fəhlələr hadisə yerinə gəldikdən sonra içəriyə daxil olan suyun qarşısı alınıb. Biz hadisə yerində olarkən qəza xidmətinin əməkdaşları partlamış borunun yenisi ilə əvəz etməkdəydilər. Artıq ərazidə su axınının qarşısı alınıb.

Təmir briqadasının işçilərinin bildirdiyinə görə, su xətti bir neçə metr dərinlikdə olduğundan qəzanın hansı hissədə baş verdiyini müəyyənləşdirmək çətin olub. Gecə saatlarında baş vermiş hadisədən sonra ətrafa yayılmış suyun hansı hissədən axdığını yalnız bu gün səhər saatlarında müəyyənləşdirmək mümkün olub.

Elxan SALAHOV