Zərifə Əliyevanın xatirəsinə həsr olunmuş “Qaranlığa nur saçan zəka” kitabı təqdim edilib

Rəşid Behbudov adına Dövlət Mahnı Teatrında şair, publisist Mirkazım Seyidovun görkəmli oftalmoloq, dünya şöhrətli alim Zərifə Əliyevanın xatirəsinə həsr etdiyi “Qaranlığa nur saçan zəka” (“Мудрость освещающая тьму”, “The intellect lightening darkness”) kitabının təqdimat mərasimini keçirilib.

APA-nın məlumatına görə, tədbir Rusiyanın Novosibirsk şəhərində fəaliyyət göstərən Heydər Əliyev adına Beynəlxalq Azərbaycan Forumunun Azərbaycandakı daimi nümayəndəliyi təşkilatçılığı ilə baş tutub. Müəllifin sözlərinə görə, avqust ayında “Qaranlığa nur saçan zəka” kitabının Rusiyada və Türkiyədə təqdimat mərasiminin keçirilməsi və həmin ölkələrin elmi kitabxanalarına nüsxələrinin təqdim olunması nəzərdə tutulur. Kitabın tirajı 2500 nüsxədir, lakin növbəti il bir çox elmi mərkəzi bu kitabla təmin etmək üçün əlavə nüsxələr çap olunacaq. M. Seyidov deyib ki, bu onun Zərifə Əliyevaya həsr etdiyi ikinci kitabdır.