İlham Əliyev Fələstinin xarici işlər nazirini qəbul edib

Prezident İlham Əliyev Fələstin Dövlətinin xarici işlər naziri Riyad əl-Malikinin başçılıq etdiyi nümayəndə heyətini qəbul edib. Lent.az-ın məlumatına görə, görüşdə Riyad əl-Maliki Prezident Mahmud Abbasın salamlarını İlham Əliyevə çatdırıb.

O, Azərbaycanın Fələstinə verdiyi dəstəyin və göstərilən humanitar yardımın ölkəsində yüksək qiymətləndirildiyini deyib. O, Azərbaycanın BMT Təhlükəsizlik Şurasına sədrliyi dövründə, ondan əvvəl və sonra bu dəstəyi daim hiss etdiklərini məmnunluqla qeyd edib.

Prezidenti İlham Əliyev Fələstinin prezidenti Mahmud Abbasın ölkəmizə uğurlu səfərini məmnunluqla xatırlayıb. Ölkələrimiz arasında dostluq əlaqələrinin yaxşı tarixə malik olduğunu vurğulayan dövlət başçımız beynəlxalq təşkilatlar çərçivəsində əməkdaşlığın və qarşılıqlı dəstəyin bundan sonra da davam etdiriləcəyinə əminliyini ifadə edib.
Prezident İlham Əliyev Prezident Mahmud Abbasın salamlarına görə minnətdarlığını bildirib, onun da salamlarını Fələstin Dövlətinin başçısına çatdırmağı xahiş edib.