Tramp Ukrayna ilə bağlı Putindən hansı güzəştlər tələb edəcəyini AÇIQLADI

Ukraynada müharibənin mümkün sona çatması ilə bağlı danışıqlar aparan ABŞ prezidenti Donald Tramp Vladimir Putinlə söhbətində qaldırmağı planlaşdırdığı mövzuları açıqlayıb.

Lent.az-ın xarici mediaya istinadla xəbərinə görə, təyyarənin göyərtəsində jurnalistlərlə söhbət zamanı o, Zaporojye Atom Elektrik Stansiyasına istinad edərək, müzakirənin ərazilər və elektrik stansiyaları barədə olacağını deyib. Bundan əlavə, o qeyd edib ki, “bəzi aktivlərin bölünməsi” ehtimalı artıq nəzərdən keçirilir.

ABŞ-ın Yaxın Şərq üzrə xüsusi nümayəndəsi Stiv Vitkoff da “CBS News” telekanalına müsahibəsində atəşkəs danışıqları kontekstində Zaporojye AES-i xatırladıb. Onun sözlərinə görə, cəbhə xəttinin müxtəlif hissələrində, o cümlədən onun fikrincə, əsas qarşıdurma zonası olan Kursk vilayətində hərbi əməliyyatların xüsusiyyətlərini nəzərə almaq vacibdir.

O, həmçinin Ukraynanı əhəmiyyətli miqdarda elektrik enerjisi ilə təmin edən nüvə reaktoru, eləcə də limanlara çıxış və Qara dənizlə bağlı razılaşmalarla bağlı məsələlərin həllinin vacibliyini vurğulayıb.

Beləliklə, ABŞ və Rusiya arasında danışıqlar təkcə hərbi əməliyyatların dayandırılmasına deyil, həm də strateji əhəmiyyətli obyektlərə aid məsələlərə toxuna bilər.

Donald Tramp ötən həftənin çərşənbə axşamı Rusiya prezidenti Vladimir Putinlə Ukraynada müharibənin mümkün sona çatmasını müzakirə etmək üçün danışıqlar aparacağını bildirib.

“Reuters” xəbər verir ki, “Air Force One” təyyarəsində jurnalistlərə açıqlama verən Tramp bildirib ki, həftə sonu əhəmiyyətli hazırlıqlar görülüb. O, münaqişənin sona çatması üçün real şansın olub-olmadığını öyrənmək istədiyini bildirib.

Amerika prezidenti əmin olduğunu bildirib ki, danışıqların yekun nəticəsi hələ ki bəlli olmasa da, nizamlanma perspektivləri yüksək olaraq qalır.