Putin Ukraynadakı müharibə haqda nə düşünür? - Avstriya kansleri AÇIQLADI

Avstriyanın kansleri Karl Nehammer Rusiya prezidenti Vladimir Putinlə görüşdən sonra hesab edir ki, Rusiya lideri Ukraynadakı müharibədə qalib gələcəyinə əmindir.

Lent.az-ın xəbərinə görə, o, bu barədə Amerikanın NBC telekanalına müsahibəsində danışıb.

“Düşünürəm ki, o, indi öz hərbi məntiqindədir. O hesab edir ki, müharibə Rusiyanın təhlükəsizliyini təmin etmək üçün lazımdır. O, beynəlxalq ictimaiyyətə etibar etmir. Düşünürəm ki, eyni zamanda, o, hazırda Ukraynada nə baş verdiyini bilir. Lakin o, müharibədə qalib gələcəyinə inanır”, - Nehammer bildirib.

Aparıcı Nehammerdən Putinin hərbi cinayət ittihamlarına reaksiyasını soruşub.

“O, bir tərəfdən beynəlxalq istintaqla əməkdaşlıq edəcəyini, digər tərəfdən isə Qərb dünyasına güvənmədiyini söylədi. Beləliklə, bu indi və gələcəkdə problem olacaq. Hesab edirəm ki, BMT-yə beynəlxalq etimad, beynəlxalq araşdırma lazımdır.

Beləliklə, bir-birimizlə çətin mübahisə apardıq. Amma mən onu inandırmağa çalışdım ki, məsələn, keçmiş Yuqoslaviya müharibəsi bizə göstərdi ki, beynəlxalq təhqiqat hərbi cinayətkarları mühakimə etmək üçün faydalıdır”, - o bildirib.

Nehammerin sözlərinə görə, Putin ona sanksiyaların Rusiya üçün ağır nəticələrindən danışıb, lakin eyni zamanda Ukraynaya qarşı “xüsusi əməliyyatın” aparılmasının zəruri olduğunu iddia etməkdə davam edib.

“Söhbətimizin sonunda o, mənə almanca dedi ki, gec deyil, müharibəni tez bitirmək daha yaxşıdır. Düşünürəm ki, o, nə baş verdiyini dəqiq bilir və biz onunla üz-üzə qalmalıyıq”, - o bildirib.

Xatırladaq ki, Nehammer Ukraynada müharibə başlayandan sonra Putinin görüşdüyü ilk Avropa lideri olub. Moskvaya səfər etməzdən əvvəl o, Kiyevdə olub və Ukrayna prezidenti Vladimir Zelenski ilə görüşüb.