Həbsdə olan jurnalistlərin və bloqqerlərin məsələsi parlamentdə qaldırılıb

Oqtay Əsədov deyib ki, Eynulla Fətullayevlə bağlı heç kimə xahiş edə bilməz

Milli Məclisin iclasında millət vəkili Cəmil Həsənli həbsdə olan jurnalistlər və bloqqerlərin həbsdən azad olunması məsələsini qaldırıb. Lent.az-ın parlament müxbirinin verdiyi məlumata görə, o, spiker Oqtay Əsədovdan xahiş edib ki, jurnalistlər Qənimət Zahid və Eynulla Fətullayev, bloqqerlər Adnan Hacızadə və Emin Millinin həbsdən azad olunması məsələsini qaldırsın: “Çünki onların həbsdə qalması Azərbaycana ziyandan başqa bir şey gətirmir”.
Cəmil Həsənli PKK-nın terror təşkilatı kimi qəbul olunması ilə bağlı Azərbaycan parlamenti tərəfindən qanun qəbul olunmasının zəruriliyini vurğulayıb.
Spiker Oqtay Əsədov isə deyib ki, o, Eynulla Fətullayevlə bağlı heç kimə xahiş edə bilməz.
Bu zaman millət vəkili Pənah Hüseyn söz almadan yerindən danışıb. O.Əsədov isə ona yerindən danışmamağı tövsiyə edib. P.Hüseyn ona məhəl qoymayaraq davam etdikdə, O.Əsədov daha bir neçə dəfə xəbərdarlıq edib: “…İnsana bir dəfə deyərlər ki, adam yerindən danışmaz”.

Pərvin ABBASOV