Elmar Məmmədyarov Pakistan Milli Assambleyasının deputatını qəbul edib

Bu gün xarici işlər naziri Elmar Məmmədyarov Pakistan İslam Respublikasının Parlamentinin aşağı palatası - Milli Assambleyanın deputatı Fəzlül Rəhmanın başçılıq etdiyi nümayəndə heyətini qəbul edib. Xarici İşlər Nazirliyinin mətbuat xidmətindən Lent.az-a verilən məlumata görə, görüşdə iki ölkə parlamentləri arasında əməkdaşlıq və bu əməkdaşlığın ölkələrimiz arasında münasibətlərə verdiyi töhfədən söz açılıb.

Elmar Məmmədyarov pakistanlı rəsmiyə ölkəsinin parlamenti tərəfindən Xocalı soyqırımını tanınmasına görə minnətdarlıq bildirib və bu addımın ədalətli olduğunu vurğulayıb. Elmar Məmmədyarov Azərbaycanın Pakistanı dəstəkləməkdə davam edəcəyini söyləyib. Görüşdə dünyada islamofobiya meylləri ilə bağlı narahatçılıq ifadə olunub. Eyni zamanda müsəlman ölkələri arasında dialoqun artırılması və həmrəylik vacib sayılıb. İki ölkə arasında münasibətlərin müxtəlif istiqamətlərdə inkişaf etdirilməsi zəruri hesab edilib.