Yeni ölümcül virusa qarşı peyvənd hazırlanır

Oksford Universitetinin tədqiqatçıları hazırda peyvəndi və ya effektiv müalicəsi olmayan milyonlarla insan üçün ciddi sağlamlıq təhlükəsi olan Nipah virusu ilə mübarizə üçün perspektivli işlərə başlayıblar.

Lent.az-ın xarici mediaya istinadən məlumatına görə, alimlərin hazırladığı və eksperimental mərhələdə olan peyvənd Oksford və AstraZeneca tərəfindən yaradılmış uğurlu COVID-19 peyvəndində istifadə olunan texnologiyaya əsaslanır. Bu üsul bədəndə immun reaksiyasını stimullaşdırmaq üçün bir viral vektordan istifadə etməyi nəzərdə tutur. Testin hazırkı mərhələsində 18 yaşdan 55 yaşa qədər 51 könüllü iştirak edir.

Nipah virusu haqqında ilk məlumat təxminən 25 il əvvəl Malayziya və Sinqapurda donuzlar və donuz fermerləri arasında xəstəliyin yayılmasından sonra ortaya çıxıb. Bu tip virus heyvanlardan insanlara, bəzi hallarda isə insandan insana keçə bilər. Virusun təbii rezervuarları meyvə yarasalarıdır və insanlar bu heyvanlarla və ya onların bədən mayeləri ilə birbaşa təmasda olduqda və ya çirklənmiş yemək yeyərək yoluxa bilər.

Nipah virusundan başqa, Ümumdünya Səhiyyə Təşkilatı gələcək pandemiyaların potensial mənbələri kimi bir sıra başqa xəstəlikləri də müəyyən edib. Oksford peyvəndinin sınaq prosesi təkcə Nipah kontekstində deyil, həm də qlobal sağlamlıq təhdidlərinə qarşı ümumi hazırlığımızı gücləndirməkdə düzgün istiqamətdə atılmış mühüm addımdır.