Hamilələrə bu şirələri içmək qadağandır – Bakteriya yaradır

Hamiləlik dövründə qadınlar qidalanmasına daha çox diqqət edir, çünki hər bir qida və içki həm ana, həm də körpənin sağlamlığına təsir göstərə bilər. Lakin hətta faydalı görünən bəzi şirələr belə təhlükə yarada bilər.

Lent.az-ın xarici mediaya istinadən verdiyi məlumata görə, dietoloq Sakşi Sinx hamiləlikdə müəyyən növ şirələrdən uzaq durmağı tövsiyə edib.

Hamiləlikdə məsləhət görülməyən şirələr

1. Qeyri-pasterizə olunmuş şirələr

Təzə sıxılmış alma və ya portağal şirəsi bakteriyalar (E.coli, salmonella, listeriya) daşıya bilər. Bu bakteriyalar ciddi infeksiyalara, hətta düşüyə və dölün inkişafında problemlərə səbəb ola bilər. Yalnız pasterizə olunmuş və ya gigiyenik şəraitdə hazırlanmış şirələr içilməlidir.

2. Nar şirəsi (çox miqdarda)

Həddindən artıq qəbul edildikdə uşaqlıq yığılmalarını stimullaşdıra bilər. Kiçik miqdarda həkim məsləhəti ilə icazə verilir.

3. Çiy tərəvəz şirələri

Xüsusilə evdən kənarda hazırlanmış çiy tərəvəz şirələri risklidir. Yaxşı yuyulmamış tərəvəzlər mikroblar daşıya bilər.

4. Qablaşdırılmış və şəkərli şirələr

Tərkibində çoxlu şəkər və konservant olan bu içkilər hamiləlik şəkərini (gestasion diabet) və artıq çəki riskini artırır. Bəzilərində süni rəngləndirici və ətirləndirici maddələr də olur.

5. Ananas şirəsi

Tərkibində olan bromelain maddəsi nəzəri olaraq uşaqlıq yığılmalarını artırır. Kiçik miqdarda, xüsusən 1-ci trimestrdən sonra adətən zərər vermir, amma erkən dövrdə məsləhət görülmür.

6. Papaya şirəsi (xüsusilə yetişməmiş meyvədən)

Lateksəbənzər maddələr ehtiva edir və bu, vaxtından əvvəl doğuş və ya düşüyə səbəb ola bilər.

Hamiləlikdə icazə verilən şirələr (mütədilliklə)

Pasterizə olunmuş portağal şirəsi – fol turşusu mənbəyi

Kök şirəsi – A vitamini mənbəyi (gündə 1 stəkandan çox olmamalı)

Pasterizə olunmuş alma şirəsi

Zoğal şirəsi – sidik yolları infeksiyalarının qarşısını ala bilər

Çuğundur şirəsi – yalnız həkim məsləhəti ilə (qan təzyiqini azalda bilər)

Mütəxəssislərin tövsiyələri:

Yalnız pasterizə olunmuş şirələr için və ya evdə yaxşı yuyulmuş meyvə-tərəvəzdən hazırlayın. Təmiz mətbəx şəraitində sıxılmış təzə şirəyə üstünlük verin. Həddindən artıq içməyin. Etiketdə əlavə şəkər və konservant olub-olmadığını yoxlayın.