Evdə hazırlanmış bananlı dondurma: cəmi 2 inqrediyentlə

İsti günlərdə insan həm sərin, həm də şirin bir şey arzulayır. Lakin mağazadan alınan dondurmaların əksəriyyəti tərkibində çoxlu şəkər, palma yağı və süni dadlandırıcılar ehtiva edir. Əgər əlinizdə yetişmiş bir banan və cəmi bir dəqiqə vaxt varsa – siz artıq mükəmməl ev dondurmasının hazırlanmasına başlamısınız deməkdir.

Lent.az-ın xarici mediaya istinadla xəbərinə görə, bu dondurma təkcə dadlı deyil, həm də o qədər faydalıdır ki, onu səhər yeməyi kimi də yemək olar.

Hazırlanması üçün sizə lazım olacaq

1 və ya 2 ədəd yetişmiş banan (nə qədər yumşaq və tünddürsə, nəticə bir o qədər şirin və krem kimi olacaq)

Hazırlanma qaydası

Bananı halqa-halqa doğrayın və ən azı 2–3 saat, ideal olaraq gecə boyunca dondurucuya yerləşdirin. Banan tam donduqdan sonra onu blenderin içinə qoyun və 1–2 qaşıq süd, qaymaq, qatıq və ya hətta kokos suyu əlavə edin – bu, daha yumşaq tekstura üçün lazımdır.

Kütləni kremvari konsistensiyaya gələnə qədər çalın. Əvvəlcə kütlə dənəli olacaq, amma 20–30 saniyə ərzində əsl jelato dondurmasına bənzər bir hal alacaq. Dondurmanı dərhal yeyə bilərsiniz və ya daha bərk bir quruluq istəsəniz, yenidən 1 saatlıq dondurucuya yerləşdirin.

Bananın üzərinə 1 qaşıq kakao əlavə etsəniz – şokoladlı dondurma alınar. Yerfındığı pastası əlavə etsəniz – qozlu dondurma əldə edəcəksiniz. Əgər dondurulmuş giləmeyvələr əlavə etsəniz – tamamilə təbii meyvəli sorbe alınacaq.

Bu desert – sağlam qidalananlar, allergiyası olanlar və ya sadəcə artıq şəkərdən uzaq dayanmaq istəyənlər üçün əla seçimdir. Uşaqlar, veganlar, idmançılar və bütün şirinsevərlər üçün idealdır.