Polad Bülbüloğlunun 70 illik yubileyi keçirildi

Lent.az-ın məlumatına görə, yubileydə hökumət və dövlət rəsmiləri, səfirlər, mədəniyyət və incəsənət xadimləri iştirak edib.

P. Bülbüloğlu konsertdə məşhur “Azərbaycan” mahnısını oxuyub və qeyd edib ki, Heydər Əliyev Sarayı onun üçün əziz yerdir: “Gəncliyimdə bu sarayda çox konsertlər vermişəm. Daha sonra nazir olanda məhz bu səhnədə böyük yubiley tədbirlərində çıxış etmişəm. 70 illik yubileyim həm də mənə ona görə əlamətdar oldu ki, prezident İlham Əliyev məni “Şərəf” ordeni ilə təltif etdi. Bu konsertdə mənim çox yaxın dostlarım iştirak edir. Onların işləri çox olsa da, vaxt tapıb bu əziz gündə mənimlə bir yerdə yubiley tədbirində iştirak edirlər”.

Yubileydə Rusiya dövlətinin nümayəndəsi Mixail Şvitkoy, Türksoyun baş katibi Düsen Kaseinov, xalq yazıçısı Anar və başqaları çıxışında yubilyarın ünvanına təbriklər söyləyiblər. Tədbir mərasimində SSRİ xalq artistləri İosif Kobzon, Nani Breqvadze, Jurabek Murodov, Rusiyanın xalq artistləri Lev Leşenko, Larisa Dolina, Zaur Tutov, Nikolay Baskov və Gürcüstanın xalq artisti Tamara Qverdsiteli, Özbəkistanın xalq artisti Fərrux Zakirov, Gürcüstanın xalq artisti Vaxtanq Kikabidze və digər mədəniyyət, incəsənət xadimləri, dövlət və hökumət nümayəndələri iştirak ediblər.

Çıxışlardan sonra yubileyin bədii hissəsi başlayıb. Üzeyir Hacıbəyov adına Azərbaycan Dövlət Simfonik Orkestrinin ifasinda, Cavanşir Cəfərovun rəhbərliyi ilə konsert proqramı davam edib.