Rusiya Federasiyasının Dövlət Mükafatı laureatı, əməkdar incəsənət xadimi, məşhur xoreoqraf və rejissor Sergey İvanoviç Qrisay Azərbaycan Dövlət Gənc Tamaşaçılar Teatrının qonağıdır. Teatrdan Lent.az-a verilən məlumata görə, o, U.Şekspirin “III Riçard” pyesi əsasında hazırlanan eyniadlı tamaşada döyüşlərin və rəqslərin qurulması üçün dəvət olunub.
Böyük İngilis dramaturqu U. Şekspirin anadan olmasının 450 illik yubileyi çərçivəsində hazırlanan tamaşanın quruluşçu rejissoru xalq artisti Cənnət Səlimova, quruluşçu rəssamı Rusiya Akademik Gənclər Teatrının baş rəssamı Stanislav Benediktov (Moskva), xoreoqrafı RF-nin əməkdar incəsənət xadimi Sergey Qrisay (Sankt Peterburq), bəstəkarı Firudin Allahverdidir.
Mədəniyyət və Turizm Nazirliyinin sifarişi ilə hazırlanan tamaşada rolları xalq artistləri Yasin Qarayev, Ağaxan Salmanlı, əməkdar artistlər Gülər Nəbiyeva, Qəmər Məmmədova, Leyli Vəliyeva, Nəsibə Eldarova oynayacaq.
Qeyd edək ki, S. Qrisay iki il öncə Dövlət Gənc Tamaşaçılar Teatrında U.Şekspirin “Romeo və Cülyetta” tamaşasında döyüşlərin və rəqslərin quruluşunu verib.
Bizi Telegram-da izləyin
t.me/lent_az
Bizi Instagram-da izləyin
Bizi Facebook-da izləyin
Bizi Twitter-da izləyin
