Əbülfəs Qarayev: “... hər cür əməkdaşlığa hazırıq”
30 may 2013 10:19 (UTC +04:00)

Əbülfəs Qarayev: “... hər cür əməkdaşlığa hazırıq”

Mədəniyyət və turizm naziri Əbülfəs Qarayev II Ümumdünya Mədəniyyətlərarası Dialoq Forumunda iştirak etmək məqsədilə Bakıya gəlmiş fransalı deputatlarla görüşüb. Bu barədə Lent.az-a nazirliyin mətbuat xidmətindən məlumat verilib. Nazir görüş zamanı  Azərbaycanla Fransanın müxtəlif sahələrdə uğurla əməkdaşlıq etdiyini, o cümlədən mədəniyyət və turizm sahəsində əlaqələrin inkişafı üçün böyük imkanlar olduğunu deyib.
Son illər iki ölkə arasında mədəniyyət sahəsində əlaqələrin genişləndiyini diqqətə çatdıran Əbülfəs Qarayev bu münasibətlərin inkişafında  Heydər Əliyev Fondunun prezidenti Mehriban Əliyevanın rolunu xüsusi vurğulayıb.
Turizm sahəsində əlaqələrdən danışan nazir qeyd edib ki, Azərbaycan Fransadan daha çox turist qəbul etməkdə maraqlıdır: "Hesab edirəm ki, Azərbaycan Fransadan olan turistlər üçün cəlbedicidir. Bunun üçün biz hər cür əməkdaşlığa hazırıq".
Nazirin sözlərinə görə, iki ölkə həm turizm, həm də mədəniyyət sahəsində maraqlı layihələr icra edə bilərlər.
Qeyd olunub ki, Azərbaycan şirkətləri Fransada, Fransa şirkətləri isə Azərbaycanda keçirilən turizm sərgilərində fəal iştirak edirlər. Ötən il Fransanın aparıcı turizm şirkətləri və KİV nümayəndələri üçün Azərbaycana infotur təşkil olunub.
 

# 451

Oxşar yazılar