“Kələğayısı gülgəz, libası əlvan”

Noyabr ayının 24-də saat 15:00 tarixində Azərbaycan Xalça Muzeyində “Kələğayısı gülgəz, libası əlvan” adlı sərgi keçiriləcək.

Azərbaycan Xalça Muzeyinin mətbuat xidmətindən Lent.az-a verilən xəbərdə qeyd edilir ki, tarixən Azərbaycanda xam ipəkdən müxtəlif növ ipək parçalar (siqlatun, xitayi, atlaz, tafta, zərbaf, çarşab, qanovuz və s.) toxunub. İpək kəlağayılar isə qəlib vasitəsilə naxışlanıb bəzədilirdi. Basma-qəlib üsulu ilə naxışlanan və “təvakeş” adlanan bu sənət nümunəsi ilə peşəkar qəlibkar ustalar məşğul olurdular.

Bir ildir ki, milli irsimiz olan baş örtüsü - kəlağayımız dünya mədəniyyətinə aiddir.

Azərbaycanda erkən orta əsrlərdə ənənəvi ipək emalı mərkəzləri formalaşmış, Basqal, Gəncə, Şəki və Şirvan şəhərlərində ipək parçaların hazırlanması geniş yayılıb. Bir tarixi faktı da demək yerinə düşər ki, 1862- ci ildə Londonda keçirilən ümumdünya sərgisində ilk dəfə olaraq Azərbaycan da təmsil olunub. Həmin sərgidə nümayiş etdirilən Basqallı sənətkar Nəsir Abduləziz oğlunun hazırladığı nəfis kəlağayı və zərif qanovuz parça gümüş medal və diplomla mükafatlandırılmışdı.

Tədbir çərçivəsində muzeyin Uşaq şöbəsi face-art proqramında kəlağayı naxışlarının uşaqların əl-üzlərinə çəkilməsi və trafaretin üzərinin rənglənməsi kompozisiyası göstəriləcək. Bundan başqa sevimli müğənnilərimizin və musiqiçilərimizin ifasında konsert proqramı da təqdim olunacaq.