Samsung Galaxy smartfonunuz istifadə edilmədiyi halda belə batareyanı sürətlə itirirsə, səbəb tətbiqlər deyil, arxa planda işləyən iki sistem funksiyası ola bilər.
Lent.az xarici KİV-ə istinadən xəbər verir ki, bu barədə How-To Geek nəşrinin eksperti məlumat verib. Onun sözlərinə görə, gizli parametrləri söndürdükdən sonra smartfon bir enerji yığımı ilə bir neçə saat daha uzun işləməyə başlayıb. Söhbət Wi-Fi skan etmə və Bluetooth skan etmə funksiyalarından gedir.
Bu funksiyalar Wi-Fi və ya Bluetooth söndürülmüş olsa belə, yaxınlıqdakı simsiz şəbəkələri və cihazları axtarmağa davam edir. Toplanan məlumatlar geolokasiya xidmətlərinin daha dəqiq işləməsi üçün istifadə olunur.
Ekspert bildirir ki, bu proses zamanı smartfon mütəmadi olaraq prosessoru, GPS-i və simsiz rabitə modullarını işə salır ki, bu da enerji sərfiyyatını artırır. Onun sözlərinə görə, hər iki funksiya söndürüldükdən sonra, xüsusilə gecə boyu şarj edilmədən qaldıqda, batareyanın ömründə nəzərəçarpacaq artım müşahidə olunub.
Wi-Fi skan etmə funksiyasını necə söndürmək olar?
"Ayarlar" bölməsinə daxil olun, sonra "Məkan" və "Məkan xidmətləri" bölməsini açın. Burada geolokasiya ilə bağlı müxtəlif seçimlər görünəcək. Təhlükəsizlik və fövqəladə hallar üçün nəzərdə tutulmuş parametrlərin altında "Wi-Fi skan etmə", "Daimi skan etmə" və ya "Həmişə əlçatan skan etmə" adlanan funksiyanı taparaq söndürün.
Bu funksiyanın adı smartfon modelindən və One UI versiyasından asılı olaraq dəyişə bilər. Əksər istifadəçilər cihazı ilk dəfə quraşdırarkən onun aktivləşdirilməsinə razılıq verirlər. Mütəxəssis eyni zamanda Bluetooth skan etmə funksiyasını da söndürməyi tövsiyə edir. Bu funksiya da oxşar prinsiplə işləyir və Bluetooth adi qaydada söndürülsə belə, geolokasiyanın dəqiqliyini artırmaq üçün modulu aktiv saxlayır.
Bu funksiyaları tam söndürmək məsləhətdirmi?
Ekspert hesab edir ki, bu funksiyalardan tamamilə imtina etmək düzgün deyil. Onlar tətbiqlərin, xüsusilə qapalı məkanlarda GPS siqnalı zəif olduqda, istifadəçinin yerini daha dəqiq müəyyən etməsinə kömək edir. Bundan əlavə, itirilmiş cihazın tapılması xidmətləri də bu imkanlardan istifadə edə bilər.
Bu funksiyalar söndürüldükdən sonra bəzi tətbiqlər geolokasiya icazəsini daha tez-tez tələb edə və ya məkanı əvvəlki qədər dəqiq təyin etməyə də bilər. Bununla belə, əsas məqsəd smartfonun daha uzun müddət enerji ilə işləməsini təmin etməkdirsə, Wi-Fi və Bluetooth-un arxa planda skan edilməsini söndürmək batareya sərfiyyatını azaltmağın ən effektiv üsullarından biri hesab olunur.
Bizi Telegram-da izləyin
t.me/lent_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
