Bakıda Kino günü qeyd edilib

Bu gün kino işçilərinin peşə bayramı münasibəti ilə Nizami Kino Mərkəzində bayram tədbiri keçirilib. Lent.az-ın məlumatına görə, tədbir başlamazdan əvvəl qonaqlar Kino Mərkəzinin foyesində müxtəlif illərdə lentə alınmış Azərbaycan filmləri üçün çəkilən dekorasiyaların və geyimlərin eskizlərinin sərgisi ilə tanış olublar. Sonra tədbir Azərbaycan kinosunun son 1 ildə qazandığı uğurları əks etdirən videofilmin nümayişi ilə başlayıb. Mədəniyyət və turizm naziri Əbülfəs Qarayev çıxışında bildirib ki, Azərbaycan kinosu ötən 1 il müddətində uğurlu yol keçib: " Azərbaycan kinosu 116-cı ilini yaşamasına baxmayaraq, hərəkətdə olan canlı bir anlayışdır. Bu gün də yeni - yeni filmlər çəkilir və həmin filmlər beynəlxalq festivallarda uğurla iştirak edir. Bir sevindirici hal da odur ki, artıq bir neçə şirkətin təqdim etdiyi layihəyə uyğun olaraq Azərbaycan Film Kinostudiyası yenidən qurulacaq. Bu da əlbəttə, bizləri çox sevindirir. Mən hər kəsi təbrik edir və gələcək fəaliyyətlərində uğurlar arzulayıram. Əminəm ki, Azərbaycan kinosu 116 yaşı olmasına baxmayaraq, yeni axtarışlarda olacaq, bununla da daha maraqlı filmlər ortaya çıxacaq".

Daha sonra Kinematoqrafçılar İttifaqının sədri, xalq artisti Şəfiqə Məmmədova çıxışnda kino sahəsində əməyi keçən hər kəsi təbrik edib. Çıxışlar bitdikdən sonra Mədəniyyət və Turizm Nazirliyinin sifarişi ilə C. Cabbarlı adına "Azərbaycanfilm" kinostudiyasında 2014-cü ildə istehsal olunmuş "Nabat" bədii filminin təqdimatı olub. Qarabağ müharibəsinin dramatik hadisələrindən birini canlandıran filmin quruluşçu rejissoru Elçin Musaoğlu, ssenari müəllifləri Elxan Nəbiyev, Elçin Musaoğlu, quruluşçu operatoru Abdulrəhim Beşarat, prodüseri Müşfiq Hətəmovdur.

Filmdə Fatimə Motamed Arya, Vidadi Əliyev, Ramin Zeynalov, Sabir Məmmədov, Fərhad İsrafilov, Rəhilə Məmmədova, Rövşən Ağayev və Həsənağa Səfərov kimi aktyorlar rol alıblar.Tədbir çərçivəsində bir qrup kino veteranı mükafatlandırılıb və "yenifilm.az" gənclər üçün kino müsabiqəsinin qalibləri elan olunub.

Qeyd edək ki, hər il avqustun 2-si ölkəmizdə kino işçilərinin peşə bayramı kimi qeyd olunur.