Bakıda “Mərkəzi Asiya örtükləri” sərgisi keçirilir

Sərgini Londonun Viktoriya və Albert muzeyi təqdim edir

Bu gündən başlayaraq, Azərbaycan Mədəniyyət və Turizm Nazirliyinin və R.Mustafayev adına Azərbaycan Dövlət İncəsənət muzeyinin təşkilatçılığı ilə Londonun Viktoriya və Albert muzeyinin təqdimatında Raunun kolleksiyasından “Mərkəzi Asiya örtükləri” sərgisi keçirilir. Mədəniyyət və Turizm Nazirliyindən Lent.az-a verilən məlumata görə, sərgi bu gün Azərbaycan Dövlət İncəsənət muzeyində baş tutacaq. Sərgidə Mərkəzi Asiyanın 58 sayda müxtəlif məqsədli geyimləri və örtükləri nümayiş etdirməsi nəzərdə tutulub.

Elmi mənbələrdən bəllidir ki, Mərkəzi Asiyanın zaman-zaman dəyişən, Xəzər dənizi, Sibir düzləri, İran səhraları ilə əhatələnən təbii sərhədləri daxilindəki ərazilərinə bu gün müstəqil dövlətlər olan Qazaxıstanın, Özbəkistanın, Qırğızıstanın, Tacikistanın, Türkmənistanın, eləcə də, Əfqanıstanın və Qərbi Çinin bir hissəsi daxildir.

Coğrafi vəziyyəti etibarilə dəniz yolları açılmazdan əvvəl Şərqlə Qərb arasında ticarətin inkişafını təmin edən Böyük İpək yolu məhz bu ərazilərdən keçirdi. Bu isə həmin ərazilərdə Mərkəzi Asiya incəsənətinin zənginləşməsinə şərait yaradıb. Sərgiyə bu incəsənətin Raunun kolleksiyasında yer alan nümunələri təqdim edilib.

Sərgi noyabrın 5-dən 2010-cu il mart ayının 3-ə qədər davam edəcək.

Lalə Yusifqızı