Gənc fotoqraflar üçün müsabiqə

Nazirlər Kabineti yanında “İçərişəhər” Dövlət Tarix-Memarlıq Qoruğu İdarəsi Birləşmiş Rəssamlar Klubu ilə birgə “Qədim Şəhər gənc fotoqrafların gözü ilə” adlı müsabiqə elan edib.

İdarədən Lent.az-a verilən məlumata görə, müsabiqənin keçirilməsində məqsəd incəsənətin populyarlaşdırılması vasitəsilə İçəri Şəhərin təbliği, ölkəmizdə yaradıcılıq işinin həvəsləndirilməsi, gənclərə dəstək və onlar arasında tarix və mədəni irsimizin önəmli bir hissəsi olan qədim şəhərə marağı artırmaqdır.

Yaradıcılıq müsabiqəsində 17-30 yaş arası gənclər iştirak edə bilər. Fotolar 2011-ci il yanvarın 5-dən 25-dək qəbul olunacaq. Fotolarda İçəri Şəhərin təbliğinə xidmət edən, tarixi-mədəni dəyərlərimizi özündə cəmləşdirən, qədim şəhərlə bağlı mövzular əks olunmalıdır.

Müsabiqənin sonunda təşkil olunacaq sərginin açılışı İçəri Şəhər ərazisində yerləşən Müasir İncəsənət Mərkəzində 2 fevral – Gənclər günündə baş tutacaq.