İlhamə Quliyeva xəstəxanaya yerləşdirilib

Xalq artisti İlhamə Quliyeva ürək əməliyyatı olunduğu xəstəxanaya yerləşdirilib.

Lent.az axsam.az-a istinadən verdiyi xəbərə görə, bu barədə müğənninin mətbuat katibi Faiq Ələkbərli bildirib. O, xalq artistinin hazırda özünü yaxşı hiss etdiyini, səhhətində ciddi problem olmadığını deyib:

“İlhamə xanım Mərkəzi Neftçilər xəstəxanasında ürək əməliyyatı olunmuşdu. Xəstəxananın Ürək və Damar Xəstəlikləri Mərkəzinin rəhbəri, cərrah Rəşad Mahmudovun məsləhəti ilə əməliyyatdan sonra sənətkar vaxtaşırı həkim müayinəsindən keçməlidir. Məhz elə buna görə də İlhamə xanım növbəti dəfə müayinədən keçmək üçün klinikaya yollanıb. Həkim məsləhətinə görə, müğənninin müayinəsi on gün davam edəcək. Hazırda onun səhhətində heç bir problem yoxdur, özünü yaxşı hiss edir. Xəstəxanada olan İlhamə xanıma bir sıra dövlət adamları və sənətçilər baş çəkib. Sənətkarı görməyə gələnlər arasında sadiq və dəyişməz komandasının üzvləri - prodüser Tarix Əliyev (Tolik), əməkdar artistlər Cavanşir Məmmədov və Firuzə İbadova, opera ifaçısı Ülvi Qılınc da yer alıb”.