Avropa Yayım Birliyindən cavab gəldi: “Hər şey dəqiq olub”

“Eurovision - 2013” Beynəlxalq Mahnı Müsabiqəsinin təşkilatçıları Azərbaycanın Rusiyaya verdiyi səslərin itməsi barədə iddiaları rəsmən təkzib edib. Lent.az-ın “haqqın.az”a istinadən məlumatına görə, bu barədə Avropa Yayım Birliyinin rəsmisi açıqlama verib.

Həmin şəxs deyib: “Hər şey dəqiq olub. Qayda pozuntuları olsaydı, biz xəbər tutardıq”.

Qeyd edək ki, Rusiya təmsilçisi Dina Qaripovaya mayın 18-də keçirilmiş finalda Azərbaycanın səs verməməsi hər iki ölkədə anlaşılmazlıqla qarşılanıb. Rusiyadakı səfirimiz Polad Bülbüloğlu bildirib ki, belə hal qeyri-mümkündür. Prezident İlham Əliyev isə xoşagəlməz insidenti araşdırmağa göstəriş verib.