Röya: “İradə ana deyil, qoy belə işlərə burnunu soxmasın!” - EKSKLÜZİV

“Oğlum Hüseyn İradəyə “qaqaş” arzulayır”

İradə İbrahimovanın mətbuat katibinin Röyanın açıqlamalarına göndərdiyi cavab Röyanın təkrar cavabı ilə qarşılaşıb. Müğənni fikirlərini mətbuat katibi Ülviyyə Alovlunun vasitəsi ilə eksklüziv olaraq Lent.az-a açıqlayıb. Açıqlamanı olduğu kimi təqdim edirik:

“Anamın adını dilinə gətirməsin, sonu pis nəticələnər. Qoy işi ilə məşgul olsun. Yeri gəlmişkən, qardaşlarım Türkiyədə təhsil alır, buna görə də o, balalarını qoruyur. İradə mənim şəxsi vəkilim deyil. Ana deyil, qoy belə işlərə burnunu soxmasın! Mən bütövlüklə sənətdəyəm. Xalqın, ictimaiyyətin danışığına fikir versək, oy, oy, oy, gərək onda nə o, nə mən yaşayım. Odur ki, belə məsələlərə çox fikir verməsin, tez qocalar. Mənim məsləhətim - yaxşısı budur, işi ilə məşğul olsun. Mən çox sevinirəm ki, adı çəkilən qadın mənim qayğıma qalır”.

Röya depressiyada olması ilə bağlı açıqlamaya da münasibət gətirib: “Təki bu gözəl hissləri yaşasın, onda görər ki, ana olanda, özü də oğlan dünyaya gətirəndə qadın dünyada ən xoşbəxt adam olur. Qoy ana olsun, mən də ondan soruşaram depressiyadadı, yoxsa yox! Çox ağıllı qadındı, yaxşı ki o var, yoxsa mən dəli olaram! Bir də, oğlum Hüseyn ona qəşəng “qaqaş” arzulayır. Qoy İradənin də anası üç nəvə sahibi olsun! 3 dəfə Amin!”

Lalə Yusifqızı