Röyanın 6 günlük konserti başladı

Dünən Bakıda Azərbaycan Akademik Opera və Balet teatrının səhnəsində müğənni Röyanın 6 günlük konserti start götürüb. Lent.az-ın məlumatına görə, Röyanın özü də konsertinə gecikənlər sırasında olub. Hamilə müğənni tamaşaçı qarşısına vaxtından 36 dəqiqə sonra çıxıb.
Qeyd edək ki, müğənninin söz verdiyi super-bahalı dekorasiyanın əvəzində sadə, gözoxşayan və o qədər də bahalı olmayan səhnə tərtibatı müşahidə olunub.
Müğənninin söz verdiyi vədlər arasında ilk oxuyacağı “Bəbələr” mahnısı reallaşıb.
Ağ geyimli Röyanın repertuarındakı “Bəbələr” və digər mahnılar canlı ifada deyil, fonoqramla təqdim olunub.
Konsert daha çox Röyanın atmaca və zarafatları ilə yadda qalıb. Röyanı izləməyə gəlməli olan rusiyalı primadonna Alla Puqaçova və Filipp Kirkorov da gözə görünməyib.
16 mahnı ilə saat yarımlıq konsert proqramı təqdim edən Röyanın çıxışı tamaşaçıları o qədər də razı salmayıb.
Lalə Yusifqızı