Rəqsanənin faiz borclarının altında!

Müğənni yenidən məhkəmə qarşısındadır

Bu gün Bakı Apelyasiya Məhkəməsində "Azər-Türk Bank" ASC-nin məşhur müğənni Rəqsanə İsmayılovaya qarşı qaldırdığı iddia üzrə keçirilməli olan məhkəmə prosesi təxirə salınıb.

Lent.az-ın əldə etdiyi məlumata görə, müğənni "Azər-Türk Bank" ASC-dən kredit yolu ilə 39375 manat borc götürüb. Lakin o, kredit faizlərini və borcunu vaxtında ödəməyib. Bu səbəbdən də bank məhkəməyə üz tutub.

İlkin faiz borcu 2214 manat olub. Rəqsanə hazırda 39375 əsas borc və 2214 manat faiz borcunu ödəmək ərəfəsindədir. Lakin hazırda bank faiz borcu olaraq qarşı tərəfdən təxminən 25 min manat istəyir. Bu isə bankın müğənnidən ümumilikdə 65 min manatadək vəsait istəməsi deməkdir. Müğənni isə əlavə 25 min manat məbləği ödəmək niyyətində deyil.

Xatırladaq ki, indiyədək Binəqədi rayon, Bakı Apelyasiya və Azərbaycan Ali məhkəmələrində bu iş üzrə dəfələrlə məhkəmə prosesləri keçirilib. Hətta məhkəmələrin birində bankın Rəqsanənin şəxsi mənzilinin hərraca çıxarılması barədə iddiası da təmin olunub.

Məhkəmə prosesi davam etdiriləcək.

Pərvin ABBASOV