Heyvanlar Elza Seyidcahanın konsertini boykot etdilər!

Konsertə bir neçə it-pişik, bir ilan və bir tısbağa gəlib...

Elza Seyidcahan vəd etdiyi kimi, iyunun 13-də heyvanlar üçün konsert verib. Lent.az-ın show.az-a istinadən məlumatına görə, saat 19-a vəd olunan konsert gecikib.

Elzanın konserti qeyri-adi şou deyil, gənc ifaçıların növbədənkənar konsert proqramı ilə start götürüb. Bu, qonaqların haqlı narazılığına səbəb olub. Heyvanlara verilən konsert marağına gələn tamaşaçıların bəzisi ippodromu tərk edib.

Nəhayət, axşam saat 9-a qalmış, Elza onu müşayiət edən simvolik heyvanlarla səhnəyə gələrək, əvvəlcə “Yenə o bağ olaydı” mahnısını oxuyub. Müğənnini müşayiət edən heyvan maskalı şəxslərin səhnədəki qeyri-adi davranışları isə ifadan çox diqqət çəkib. Əvvəlcədən verilən vədlərə baxmayaraq, konsertdə adıçəkilən heyvanlardan heç biri olmayıb. Bir neçə it-pişik, bir ilan, bir tısbağa konsertə gətirilən heyvanlar arasında olub. Əsasən gənc ifaçıların iştirak etdiyi konsertdə bəstəkar-müğənninin müəllimi, xalq artisti Arif Məlikov və müğənni Brilliant Dadaşova olub.

Konsertdə ən gülməli məqamlardan biri də konsertdə iştirak etməyən İlhamə Quliyevanın pişiyi Markizin Elzaya məktubu olub.

İctimai qınağın şiddətləndiyini görən Elza sonradan öz fikirlərini redaktə edərək, konserti heyvanlar üçün yox, heyvanları müdafiə məqsədi ilə insanları birləşdirmək üçün verdiyini deyib.

Konsertdə heyvanlara yardım məqsədi ilə ianə qutuları qoyulub.