Aysel: “Araşla bacı-qardaşıq”

“Eurovision” təmsilçilərimiz barələrində yayılan xəbərləri təkzib etdilər

“Biz Araşla bacı-qardaşıq. Aramızda başqa heç bir bağlılıq yoxdur. Hovuz başında yayılmış fotolarımızı paparasilər çəkib. Orda biz tək deyildik, Azərbaycan nümayəndə heyətinin bütün üzvləri bizimlə idi. Hamımız istirahət edirdik. Biz çox gərgin və davamlı məşqlər edirik. Yorğun olduğumuz üçün bütün heyətlə birgə istirahətə getdik. Amma çox yanlış reaksiyaya səbəb olacaq fotolar ortaya çıxdı”.

Bunu “Eurovision-2009” yarışmasını izləmək üçün APA-nın Moskvaya ezam olunmuş xüsusi müxbirinə müsahibəsində müsabiqədə Azərbaycanı təmsil edən Aysel Teymurzadə və Araş söyləyib.

Onlar hovuz başındakı şəkillərinin mediada yayılmasından narahat olduqlarını da etiraf ediblər.

Araş bildirib ki, o evlidir: “Bu fotoların mənim ailə həyatıma problemlər yaratmamasını istəyirəm. Biz Aysellə müsabiqədən sonra da dost qalacağıq, cünki bizi böyük tellər bağlayır. Aysel mənə və həyat yoldaşıma hörmət edir. Bu hörmət bizim tərəfimizdən də qarşılıqlıdır” .