Su, torpaq, yel, od və... “Dance” çərşənbəsi!

“Next” qrupu və müğənni Elnarə martın 23-də “Metkartinq”də “Dance çərşənbəsi” adlı konsert proqramı ilə yenidən tamaşaçı qarşısına çıxacaq. Bu barədə Lent.az-a qrupun mətbuat xidmətindən məlumat verilib: “Love for sale” adlı klub konsertindən sonra yenidən konsert təklifi aldıq. “Flame” prodakşn konsertin təşkilatçılığını üzərinə götürüb. Təklifi məmnuniyyətlə qəbul etdik, çünki Azərbaycanda klub konsertlərini intensivləşdirmək əzmindəyik. Yenə fərqli proqram, yeni mahnılar, sürprizlər olacaq. Bu dəfə də “Supper” Elnara bizimlə bərabər olacaq”.

Mətbuat katibi konsertin adının mənasını açıqlayıb: “Su, torpaq, yel, od çərşənbəsindən sonra beşinci çərşənbə “Dance” çərşənbəsi olacaq. Bunun üçün yaradıcı qrup xüsusilə hazırlaşıb. Konsertdə tamaşaçıları “N-print” şirkətindən hədiyyələr də gözləyir”.

Mətbuat xidməti qrup üzvlərinin hazırda Ukraynada olduğunu, bununla da bağlı sürprizlərin olduğunu xəbər verib: “Bu barədə də məlumatı eşitməyinizə az qalıb”

Qeyd edək ki, konsertin informasiya dəstəyi Lent.az, Vesti.az, 1news.az və Tac.az-dır.
Konsert “Flame” şirkətinin təşkilatçılığı ilə həyata keçirilir.

Lalə Yusifqızı