Əməkdar artist : “Millət vəkili olaram...”

Əməkdar artistlər Elza Seyidcahan, Tünzalə Ağayeva və Azərin millət vəkilliyinə namizədliklərini irəli sürdükləri barədə iddiaları təkzib ediblər. Sənətçilər Lent.az-a açıqlamalarında yaxın illərdə bu fikirdə olmayacaqlarını bildiriblər.

Sənətçi Azərin sənətini xüsusi siyasi kursla davam etdirdiyini qeyd edib: “Hazırda “TRT Avaz” proqramında həftə içi beş gün proqramım davam etməkdədir. Müxtəlif sənət adamları ildə görüşlər, müzakirələr – bu özü də sənət adına siyasətdir. Qardaş ölkədə doğma vətənimi doğru, düzgün şəkildə təmsil edirəm. Yaradıcılıqla çox məşğulam. Lakin bir-iki ildən sonra millət vəkili kimi fəaliyyət göstərə biləcəyim də istisna deyil”.

Tünzalə Ağayeva millət vəkili olmaq iddiasının 5-6 ildən sonra reallaşa biləcəyini vurğulayıb: “Millət vəkilliyinə namizədliyimi irəli sürmək iddiam real deyil. Ola bilsin ki, ictimaiyyət tərəfdən belə istək var, buna görə də xəbərlər dolaşır. 5-6 ildən sonra bu fikir reallaşa bilər, hazırda ictimai-sosial layihələrdə iştirak edirəm. Məsələn, insan alverinə qarşı kampaniyada iştirak edirəm”.

Elza Seyidcahan isə sənətinin vəkili olduğunu iddia edib: “Millət vəkili olduqdan sonra ölkəmə yararlı ola biləcəyimi düşünənlərdən deyiləm. Mən sənətimin vəkiliyəm. Bir sıra sosial layihələrə imza atmışam. Bundan sonra da olacaq. Amma şəxsən özüm namizədliyimi irəli sürüb, şəxsən müraciət etmərəm. Xalqım məni millət vəkili görmək istəsə, dırnaqarası baxmaram, millət vəkili olaram...”

Lalə Yusifqızı