İşgüzar adamlar üçün Britaniya ulduz falı (26 noyabr- 2 dekabr)

Astroloqlar bu həftə QOÇLARA qeyri-adi çalışqanlıq vəd edirlər. Amma çox da canfəşanlıq etməyin, yoxsa ruh yüksəkliyiniz Bakı qarı kimi gün çıxan kimi əriyəcəkdir. Mənasız işlərlə məşğul olmaq istəyinizə isə rəhbərliyin sizə ciddi işlər etibar etməməsi ilə bəraət qazandırmağa çalışacaqsınız. Ehtimal ki, ailə büdcəniz xeyli genişlənəcəkdir. Çox təəssüf ki, maliyyə durumunuz özünüzdən əsirgədikləriniz hesabına möhkəmlənəcəkdir.

BUĞALAR bilavasitə rəisləri olan insanlarla yamanca dostlaşacaqlar. Ruh yüksəkliyiniz işgüzarlığınıza təsir göstərəcəkdir. Özünüzü ciddi işlərə kökləyin. Vaxt gözləmir. Yeni il bayramında əzizlərinizi sevindirmək üçün pul yığmalısınız. İndiki vəziyyətdə bahalı şeylər almaqdan imtina edin. Onsuz da bir azdan bütün dükanlar güzəştli qiymətlər təklif edəcəkdir. Bazarlığınızı həmin günlərə saxlayın.
Səma cisimlərinin düzümü ƏKİZLƏR bürcü altında doğulan sahibkar kişini xəyallarının qadınına rast gələcəyini göstərir. Gənc evlilərin ailə həyatında ixtilaflar gözlənilir. Sevgilinizin xırda şıltaqlıqlarına göz yuma bilsəniz, münasibətlərinizə daha səmimi və mehriban notlar qata bilərsiniz. Xasiyyətinə bələd olmadığınız əməkdaşların məsləhətlərini qulaq ardına vurmağınız məsləhətdir. Ezamiyyətdə olanları isə maraqlı sərgüzəştlər gözləyir.

XƏRÇƏNGLƏR işləmək əzmi ilə ətrafdakıları mat qoyacaqlar. İşlər sözün əsl mənasında əlinizdə qaynayıb sizi meteor sürəti ilə irəliləməyə məcbur edəcəkdir. Ehtiyatlı olun ki, kosmik fəlakət törətməyəsiniz, çünki nəyin bahasına olursa-olsun, uğur qazanmaq istəyi çoxdan bəri quyunuzu qazan, işinizi bitirmək niyyətində olan bədxahlarınızın dəyirmanına su tökəcəkdir.

ŞİRLƏR onları gözləyən acı xəbərlərin ümidsizliyinə qapılmamalıdırlar. Mənəvi gücünüz sayəsində səyləriniz heç gözləmədiyiniz şəkildə mükafatlandırılacaqdır. Biznesmenlərdən riskə getmək bacarığı tələb olunacaqdır. İmkanlarınızı düzgün bölüşdürsəniz, böyük qazanc əldə edəcəksiniz. Lakin səhmlərə yatırdığınız sərmayədən qazanc gözləmək hələ tezdir. Münəccimlər iddia edirlər ki, bu ay bağlanan nikahlar alınmaz qala kimi möhkəm olacaqdır.

QIZLARI işdə maraqlı layihələr gözləyir, lakin onları həyata keçirmək üçün asudə vaxtınızın bir qismindən vaz keçməli olacaqsınız. İmkanlarınızı real qiymətləndirməli, çəkə bilmədiyiniz yükün altına girməməlisiniz. İlk baxışda sadə görünən məsələlərin, əslində, gizli və mürəkkəb mənası vardır.

TƏRƏZİLƏRƏ hisslərinin əsirinə çevrilmək məsləhət görülmür. Yalnız təmkininizi qoruyub saxlamaqla istədiyinizə nail ola bilərsiniz. Fiziklərin kəşfləri onlara yüksək dividentlər gətirə bilər, lakin yeni ideya axtarışına çıxmasalar, bu eyforiya uzun sürməyəcəkdir. Münasibətsiz bir zarafat sevgililərin arasını vura bilər. Amma bu bürcün artıq ailə həyatında “bişmiş” nümayəndələri üçün əsl idilliya başlayır. Bu günlər bir-birinizi adi baxışdan anlayacaq, can deyib can eşidəcəksiniz.

ƏQRƏBLƏR bu həftə təklif olunan yardımdan imtina etməməlidirlər. İdeya qıtlığından əziyyət çəkdiyiniz bir vaxtda dost və tanışlar köməyinizə gələcəklər. Onların dəstəyi ilə silahlanıb cəsarətlə istədiyiniz layihəni həyata keçirə bilərsiniz.

OXATANLAR hədəfləri bir daha gözdən keçirib məqsədə çatmaq üçün özlərində güc tapmalıdırlar. Maliyyə itkiləri sizi kədərləndirməməlidir. Gələcək qarşınızda yeni cəlbedici imkanlar açır. Bu həftə iri bazarlıq etməyin. Qənaətlə topladığınız pullar tezliklə gərəyiniz olacaqdır. Ola bilsin, sizə yeni iş təklif edəcəklər, lakin ulduzların düzümü elədir ki, köhnəsinə sadiq qalmağınız daha məsləhətdir. Ailə məsələlərinə gəldikdə isə valideynlər küsüşəcək, övladlar isə onları barışdıracaqlar.

OĞLAQLAR bu həftə özlərinə qapanmamalıdırlar. İşdə də, evdə də mümkün qədər təvazökar və sadə davranın ki, yanınızdakılar özlərini rahat hiss etsinlər. Yaxşı olar, telefon kitabçanızı çıxarasınız, bir-bir köhnə tanışlara zəng edib onlardan hal-əhval tutasınız, sonra da yaxşı bir məclis qurub, hamını başınıza toplayasınız. Onda özünüz də təəccüblənəcəksiniz ki, üçsaatlıq məhrəmanə söhbətdən elə bir enerji toplamısınız ki, azı yarım il sizə kifayət edər.

Həftə DOLÇALARDAN maksimum dərəcədə diqqətli olmağı tələb edəcəkdir. Xüsusən, biznes məsələlərində emosional vəziyyətdə tələsik qərarlar qəbul etməyə çalışmayın, çünki bu günlər iradənizin möhkəmliyi ciddi şəkildə sınağa çəkiləcəkdir. Evdar xanımlar qonaq-qara qarşılamaq məharətlərini nümayiş etdirmək üçün çox zəhmət çəkməli olacaqlar. Ulduzlar bəzilərinizin qısa müddətə yaxınlarından ayrılacağı barədə xəbərdarlıq edir.

BALIQLAR başqalarının sirlərindən uzaq olmalıdırlar. Kiminsə ürək sözünü dinləmək baha başa gələ bilər. Sizi söz gəzdirməkdə, ara qızışdırmaqda ittiham edə bilərlər. Uzaq biznesmen qohumlarınızdan birlikdə iş qurmağı təklifi gələcəkdir. Gün hayandan doğub görəsən?! Yaradıcı işçilərin xarici ezamiyyəti müəmmalı səbəb üzündən baş tutmayacaqdır. Lakin siz elə bir işin öhdəsindən gələcəksiniz ki, indiyədək işdəki bütün uğursuzluqlarınızın üstündən yağlı xətt çəkiləcəkdir.