Cavid Qurbanov: “Yük avtomobilləri yolları dağıdır”

Milli Məclisin İqtisadi siyasət, Hüquq siyasəti və dövlət quruculuğu komitələrinin bu gün keçirilən birgə iclasında “İnzibati xətalar haqqında” qanun layihəsinə əlavə və dəyişikliklər müzakirəyə çıxarılıb.

Lent.az-ın məlumatına görə, layihə barədə danışan Hüquq siyasəti və dövlət quruculuğu komitəsinin sədri Əli Hüseynli sürücülərinin inzibati məsuliyyətini müəyyən edən bəzi dəyişiklərin vacibliyini önə çəkib. Komitə sədri deyib ki, hazırda bu sahədə çox ciddi problemlər var. Onun fikrincə, bu problemləri həll etmək üçün ilk növbədə sürücülərin məsuliyyət yükünü artırmaq və cərimələri sərtləşdirmək lazımdır.

“Azəryolservis” ASC-nin sədri, millət vəkili Cavid Qurbanov isə yük daşıyan avtomobillərin normadan artıq yüklənməsi səbəbindən yeni salınan yolların və körpülərin dağılmasından şikayətlənib. Avtomobil yollarının dövlət büdcəsindən olan iri məbləğli vəsaitlər hesabına salındığını xatırladan millət vəkili yol infrastrukturunun dağılmasına görə sürücüləri günahlandırıb: “Hər bir maşının yükgötürmə qabiliyyəti var. Amma sürücülər öz avtomobillərini normadan bir neçə dəfə artıq yükləyir. Nəticədə yollar çökür və qısa zaman içərisində sıradan çıxır. Vəziyyət bu cür davam etsə, yollar sıradan çıxacaq”.

Cavid Qurbanov bununla əlaqədar qanunvericilikdə sürücülərin məsuliyyətinin artırılmasına, cərimələrin bir qədər də sərtləşdirilməsinə tərəfdar olduğunu deyib.

Müzakirələrdən sonra komitə üzvləri qanuna əlavə və dəyişiklikləri Milli Məclisin plenar iclasına tövsiyə edib.

Elxan SALAHOV