Nazirlər ekoloji sərgiyə baxıb

Bakıda “Azərbaycan yaşıl dünya naminə” üç günlük beynəlxalq sərgi keçirilir

Bu gün Bakıda “Azərbaycan yaşıl dünya naminə” devizi altında beynəlxalq ekoloji sərgi keçirilib.

Ekologiya və Təbii Sərvətlər Nazirliyinin mətbuat xidmətindən Lent.az-a bildiriblər ki, Ticarət və Sənaye Palatasının təşkilatçılığı Heydər Əliyev adına İdman-Konsert Kompleksində keçirilən sərgiyə Azərbaycanın dövlət və hökumət nümayəndələri də qatılıb. Onların arasında ekologiya və təbii sərvətlər naziri Hüseynqulu Bağırov, fövqəladə hallar naziri Kəmaləddin Heydərov, mədəniyyət və turizm naziri Əbülfəs Qarayev də olub.

Beynəlxalq sərgidə ekoloji problemlərin həllində qabaqcıl təcrübəyə malik 30-a yaxın xarici, eləcə də yerli şirkətlər, o cümlədən dövlət qurumları və qeyri hökumət təşkilatları iştirak edirlər. 2010-cu ilin Azərbaycanda “Ekologiya ili” elan olunması münasibəti ilə keçirilən sərginin əsas məqsədi ölkəmizdə və digər xarici ölkələrdə ətraf mühitin sağlamlaşdırılması istiqamətində həyata keçirilən tədbirlərin və “yaşıl” texnologiyaların geniş auditoriyaya təqdim edilməsi, bu sahədə şirkətlər tərəfindən qazanılmış qabaqcıl təcrübənin nümayiş etdirilməsi, təcrübə mübadiləsinin aparılması, yeni əlaqələrin qurulmasıdır. “Azərbaycan Yaşıl Dünya naminə” beynəlxalq sərgi ətraf mühitlə bağlı bütün sahələri (xüsusi mühafizə olunan təbiət əraziləri, su bioresursları, meşələr, ətraf mühitin monitorinqi, hidrometeorologiya, neft-qaz sektoru, meliorasiya və su təsərrüfatı, su təchizatı və kanalizasiya, kənd təsərrüfatı) əhatə edir.

Üç gün davam edəcək sərgiyə Ekologiya və Təbii Sərvətlər Nazirliyi dəstək verib.

Elxan SALAHOV