Zelenski baş məşqçini bütün titullardan məhrum etdi

Ukrayna prezidenti Vladimir Zelenski “Zenit”in baş məşqçisi Anatoli Timoşçukun dövlət mükafatlarından məhrum edilməsi haqqında fərman imzalayıb.

Lent.az xarici mediaya istinadla bildirir ki, mükafatlardan məhrum edilənlər siyahısına Ukrayna millisinin sabiq futbolçusu ilə yanaşı daha 33 nəfərin adı salınıb.

2022-ci ilin martında Ukrayna Futbol Assosiasiyasının Nəzarət və İntizam Komitəsi Anatoli Timoşçuku Pro səviyyəli lisenziyasından və Ukraynada qazanılan bütün titullardan məhrum edib. Anatoli Timoşçuk İdman Arbitraj Məhkəməsinə (CAS) UAF-ın onu məşqçilik lisenziyasından və milli səviyyədə titullarından məhrum etmək qərarına qarşı iddia qaldırıb. Bu yaxınlarda məlum olub ki, CAS UAF-nin qərarından apellyasiya şikayəti vermək məsələsində Timoşçukun tərəfini tutub.

Anatoli Timoşçuk Ukrayna millisinin heyətində keçirdiyi oyunların sayına (144 oyun) görə rekordçudur. O, Donetsk "Şaxtyor"u ilə üç dəfə ölkə çempionu olub, həmçinin üç dəfə Ukrayna kuboku və bir Superkuboku qazanıb.

45 yaşlı Timoşçuk 2007-2009 və 2013-2015-ci illərdə "Zenit"də çıxış edib, 2017-ci ildən isə Sankt-Peterburq komandasının məşqçilər korpusunda yer alıb.