Yaxın vaxtlarda futbol üzrə MDB çempionatının layihəsini işləyib hazırlamaqla məşğul olan komitə yaradılacaq. Lent.az-ın məlumatına görə, bu barədə Rusiya Futbol Premyer Liqasının (RFPL) prezidenti Sergey Pryadkin keçirdiyi mətbuat konfransında açıqlama verib.
O bildirib ki, yekun konsepsiya UEFA-nın təsdiqinə veriləcək.
“Zenit”in prezidenti Aleksandr Dyukov isə MDB çempionatı layihəsi ilə məşğul olan təşəbbüs qrupuna bu klubdan əlavə, “Anji” və MOİK-in də daxil ediləcəyini söyləyib. O, digər klubların da bu qrupa qoşulmasının mümkünlüyünü bildirib.
MOİK-in prezidenti Yevgeni Giner isə MDB çempionatı ideyasının məlum “Dinamo”- “Zenit” matçı ilə əlaqəli olmadığını açıqlayıb. Onun sözlərinə görə, bu layihə ilə məşğul olmağa UEFA-dakı dəyişikliklər imkan verib. Artıq Avropa futbol qurumu birləşmiş turnir ideyasına fərqli yanaşmağa başlayıb. Giner bildirib ki, yeni liqaya “neytral şəxs” rəhbərlik etməlidir. Həmin insan isə Pryadkin olmalıdır.
RFPL-in rəhbəri layihənin ona maraqlı göründüyünü söyləsə də, MDB çempionatına rəhbərlik etməsinin nə dərəcədə mümkünlüyünü şərh etməyib.