Cavid İmamverdiyev: "Dinamo"da mənə dedilər ki, hazır deyilsən"

“Neftçi”nin futbolçusu Cavid İmamverdiyev klubun rəsmi saytına müsahibə verib. Apasport.az saytının məlumatına görə, gənc yarımmüdafiəçi Kiyev “Dinamo”suna keçidinin alınmamasının səbəblərindən danışıb.

- “Neftçi”nin Avroliqanın qrup mərhələsindəki çıxışından sonra digər futbolçularımız kimi səninlə də bir çox Avropa klubları maraqlanmağa başladı. Hətta Ukraynanın “Dinamo” klubunun düşərgəsinə də yollanmışdın. Bu təkliflər arasında niyə məhz “Dinamo” klubunu seçmişdin?
- Doğrudan da avrokuboklardakı çıxışımızdan sonra təkliflər çoxaldı. Bu klublar arasından “Dinamo”nun təklifi mənə daha maraqlı idi. Bu klubun ənənəsi və gücü göz qabağındadır. Yetirməsi olduğum “Neftçi” klubunun rəhbərliyi də mənim ölkə xaricinə çıxmağımı və ən önəmlisi əsas komandada möhkəmlənməyimi istəyirdi, eyni zamanda ikinci heyətdə oynamağımı məqsədəuyğun saymırdı. Mən özüm klub prezidenti Sadıq Sadıqovdan israrla xahiş etdim ki, Kiyevə gedim. Yoxlama oyunlarından sonra mənə “Dinamo-2”də oynamaq təklif olundu. Məşqçilər dedi ki, əsas komandada oynamağa hələ hazır deyiləm. İkinci heyətdə isə çıxış etmək istəmədim.

- Nə üçün digər təklifləri dəyərləndirmədin?
- İndi bu haqda düşünürəm və fikirləşirəm ki, “Dinamo”ya keçməkdə israr etməsəydim, digər variantlardan yararlana bilərdim. Hər halda biz səhvlər üzərində öyrənirik. Gələcək transfer dönəmində necə addım atacağımı bilirəm. Əlbəttə güclü komandada oynamaq hər kəsin arzusudur, amma gərək əsas heyətdə meydanda olub sözünü deyə biləsən. Məndən əvvəl Araz Abdullayev ölkə xaricində oynamışdı. Həmin dövrdə “Neftçi” rəhbərliyi israrla onun əsas heyətdə meydana çıxması şərtini irəli sürmüşdü. Əgər bundan sonra legioner həyatı yaşasam, hisslərimlə deyil, komandamızın uyğun gördüyü şəkildə hərəkət etməyə çalışacam. Bu daha məntiqli və doğru olar.