Azad Rəhimov: "Əsas məsələlər sirr olaraq saxlanılır"

Gənclər və idman naziri Azad Rəhimov Rusiyanın "İTAR-TASS" İnformasiya Agentliyində "Bakı 2015" Avropa Oyunları ilə bağlı mətbuat konfransı keçirib.

Lent.az-ın məlumatına görə, Azad Rəhimov jurnalistlərlə görüşündə bildirib ki, Bakıda keçiriləcək ilk Avropa Oyunlarının rəsmi açılış və bağlanış mərasimləri Azərbaycan mədəniyyəti və musiqi irsinin elementlərindən istifadə etməklə parlaq və rəngarəng keçiriləcək. Nazir deyib ki, belə hallarda əsas məsələlər sirr olaraq saxlanılır.

Bakıda ilk Avropa Oyunlarının rəsmi açılış mərasimində bir sıra ölkələrin dövlət başçılarının iştirakı məsələsinə toxunan nazir qeyd edib ki, hazırda bu barədə danışmaq çətindir: "Bu, dövlət başçılarının iş qrafikindən asılı olacaq, amma bəziləri artıq Oyunların açılış mərasimində iştirak etməyə razılıq veriblər". İlk Avropa Oyunlarının mədəni proqramından danışan A.Rəhimov bildirib ki, Azərbaycan dünya şöhrətli ulduzları dəvət etmək niyyətində deyil, lakin Bakının bütün mədəniyyət obyektləri turistlər üçün açıq olacaq, xüsusi mədəni proqramlar təşkil olunacaq.

Onun sözlərinə görə, yarışların keçirilməsi zamanı bütün təhlükəsizlik tədbirləri görüləcək. Nazir qeyd edib ki, iqtisadi böhran Oyunların təşkilinə heç cür təsir göstərməyib: "Bu möhtəşəm tədbirin maliyyələşməsinə çəkilən xərclər dövlət büdcəsində nəzərdə tutulub". Nazir deyib ki, Avropa Oyunlarının Təşkilat Komitəsi tədbirin könüllüləri qismində tələbələri seçib: "150 min tələbə anketdə olan suallara cavab verib. 20 mindən artıq tələbə Oyunlarda iştirak etmək istəyini bildirib. Onlar iki qrupa bölünəcəklər. Birinci qrup əlaqələndirmə, ikinci qrupa isə Oyunların açılış və bağlanış mərasimlərində iştirak edənlər daxil ediləcək. Hər qrupun hazırlıq keçəcəyi mərkəzləri var".

A.Rəhimov qeyd edib ki, birinci Avropa Oyunlarını işıqlandıracaq jurnalistlərin qeydiyyatı artıq açıqdır: "Bunun üçün Media kəndi hazırlanıb, qidalanma məsələsi də həll edilib". Onun sözlərinə görə, Azərbaycan Oyunların yekunu üzrə müəyyən statistika aparır: "Əvvəlcədən demək istəməzdim, amma bizim mükafat gözlədiyimiz əsas idman növləri cüdo, taekvondo, boks, akademik avarçəkmə, gimnastikadır".Nazir bildirib ki, Azərbaycan Avropa Olimpiya Komitəsi ilə məsləhətləşmələr aparıb: "Təbii ki, bizi çimərlik futbolu da maraqlandırır. Belə ki, ölkədə bir çox yaxşı çimərlik var. Ümid edirik ki, ölkədə bu idman növünün inkişafına təkan veriləcək".