Arda: "Hər gün bunun üçün dua edirəm"

Türkiyə yığmasının və “Atletiko”nun futbolçusu Arda Turan FİFA-nın rəsmi saytına açıqlama verib. Millinin hazırkı vəziyyətinə toxunan 27 yaşlı yarımmüdafiəçi “Türkiyə nə vaxt böyük turnirlərə vəsiqə qazanacaq?” sualını belə cavablandırıb: “Ümid edirəm ki, yaxında. Hər gün bunun üçün dua edirəm. Avro-2008-də yarımfinala qədər yüksəldik və çox böyük təcrübə qazandıq. Həmin potensial indi də bizdə var. Yeganə çatışmazlığımız komanda halında müdafiə oluna bilməməyimizdir. Fatih Terimin üzərinə çox düşüblər. Amma onun milliyə qayıdışı məni çox sevindirdi. Terim mənim üçün həm məşqçi, həm dost, həm də atadır. İş tərzinə görə mənə Dieqo Simeoneni xatırladır. Hücum etmək Türkiyə millisinin qanındadır. Lakin müdafiə olunmağı yaxşı bacarmırıq”.