“Ronaldu Messidən güclüdür” - AÇIQLAMA

Futbol üzrə Braziliya milli komandasının baş məşqçisi Luis Felipe Skolari İspaniyanın “Barselona” klubunun hücumçusu Lionel Messi ilə “Real Madrid”in forvardı Kriştianu Ronaldunu müqayisə edib. Lent.az-ın məlumatına görə, braziliyalı mütəxəssis Messini fantastik oyunçu saysa da, Ronaldunun ondan güclü olduğunu bildirib.

Skolarinin fikrincə, “Barsa”nın futbolçuları argentinalı hücumçunu böyük ulduz sayırlar. Amma portuqaliyalı forvarda gəldikdə, baş məşqçi “Real Madrid”in oyunçularının ona paxıllıq etdiklərini düşünür: “Məndə belə təsəvvür yaranıb ki, “kral klubu”nda oyunçular ondan narazıdırlar. Amma Ronaldu elə güclü oyunçudur ki, komanda yoldaşları ona paxıllıq edirlər. Buna baxmayaraq, o, Messiyə uduzmur və mənim üçün ən yaxşısı Kriştianudur”.

Qeyd edək ki, Luis Felipe Skolari 2003 – 2008-ci illərdə Portuqaliya milllisində baş məşqçi olduğu vaxt Kriştianu Ronaldu onun rəhbərliyi altında çıxış edib.