“Qarabağ” erməniləri susduracaq” - Kamal Quliyev

“Marsel”in adı ağırdır. Ancaq indi adın çəkisindən qorxmaq lazım deyil”.

Bu barədə apasport.az saytına açıqlamasında Azərbaycan millisinin sabiq futbolçusu Kamal Quliyev Konfrans Liqasının pley-off mərhələsində keçiriləcək “Marsel” – “Qarabağ” oyununu dəyərləndirərkən deyib.

“Keşlə” akademiyasında fəaliyyət göstərən 46 yaşlı mütəxəssis hesab edir ki, Fransa klubu qarşılaşmaya qeyri-ciddi yanaşa bilər: “Maraqlı oyun gözləyirəm. “Marsel” kimi klublar Konfrans Liqasını öz səviyyələrinə yaraşdırmırlar, turnirə ciddi yanaşmırlar, oyunlara barmaqarası baxırlar. Amma yenə də reytinq məsələsi var. Əgər meydana çıxdınsa, oynamalısan. Onların aparıcı futbolçuları özlərini qoruya, baş məşqçi də gəncləri sınamaq qərarına gələ bilər. Bu münasibətə görə “Qarabağ” “Marsel”i cəzalandıra bilər”.

Quliyev “Velodrom”dakı matçda “Qarabağ”a qarşı növbəti erməni təxribatının olacağını düşünür: “Mənim fikrimcə, Marseldəki ermənilər nə edəcəklərini çoxdan planlaşdırıblar. Ortada Qarabağ adı var və Marsel şəhərində də ermənilər çoxluq təşkil edir. Yüz faiz təxribat olacaq. Sadəcə, futbolçularımız o təxribatlara uymasınlar. Yəqin ki, lazımi qurumlar da onların cəzasını kəsəcək. İnanıram ki, “Qarabağ” oyunu ilə onları susduracaq”.

Qeyd edək ki, bu gün keçiriləcək oyun Bakı vaxtı ilə saat 00:00-da başlayacaq.