“Liverpul”da Yurgen Kloppun yerinə sürpriz namizəd

Mövsümün sonunda alman baş məşqçi Yurgen Kloppla yollarını ayıracaq "Liverpul"da onu əvəz edə biləcək namizədlərin axtarışları davam edir.

Lent.az-ın xarici mediaya istinadən məlumatına görə, Yurgen Kloppdan sonra "Liverpul"un yeni baş məşqçisi xorvatiyalı Niko Kovaç olacağı iddia edilib.

“Daily Mail”in xəbərinə görə, daha əvvəl karyerasında "Bavariya", "Monako" və "Volfsburq"u çalışdırmış Niko Kovaçın "Liverpul"un yeni baş məşqçisi olacağı ilə bağlı söz-söhbətlər yayılıb.

Xəbərdə "Liverpul" idarəçilərinin Yurgen Kloppun yerinə namizədlərlə bağlı məlumat topladığı və prosesin böyük diqqətlə aparıldığı bildirilib.

Bu ehtimalı son olaraq Bundesliqa təmsilçisi “Volfsburq”u çalışdıran 52 yaşlı xorvatiyalının nümayəndələrinin bu yaxınlarda Londonda olması və yayda mümkün məşqçi dəyişikliyi edəcək Premyer Liqa komandaları ilə bağlı araşdırmalar aparması iddianı gücləndirir.

Xəbərin başqa bir təfərrüatı odur ki, Lissabonun “Sportinq” klubunun baş məşqçisi Ruben Amorim Kloppun yerinə ən güclü namizəd olsa da, o, “Liverpul”la danışıqlar apardığı və ya hər hansı məsələ ilə bağlı razılığın əldə olunduğu iddialarını təkzib edib və bu, Kovaçla bağlı iddiaları gücləndirir.