“Barselona” pley-off mərhələsinə vəsiqə qazandı

Futbol üzrə Çempionlar Liqasının qrup mərhələsinin 5-ci turunun matçında İspaniya “Barselona”sı Portuqaliya “Portu”nu 2:1 hesabı ilə məğlub edərək, turnirin pley-off mərhələsinə vəsiqəni təmin edib.

Lent.az xəbər verir ki, "Barselona"nın qollarını João Cancelo (32-ci dəqiqə) və João Feliks (57) vurub. "Portu"nun heyətində Pepe qol vurub (30).

H qrupunun digər oyununda isə Ukraynanın “Şaxtyor” komandası Belçikanın “Antverpen” komandasına 1:0 hesabı ilə qalib gəlib. Turnir cədvəlində lider 12 xalla 1/8 finala vəsiqəni təmin edən "Barselona"dır. Sonrakı yerləri “Portu” (9 xal), “Şaxtyor” (9) və Antverpen (0) tutur. Dekabrın 13-də keçiriləcək final mərhələsində “Barselona” səfərdə “Antverpen”lə, “Portu” isə “Şaxtyor”u qəbul edəcək.

F qrupunun matçlarında Almaniyanın “Borussiya Dortmund”u İtaliyanın “Milan”ına 3:1 hesabı ilə qalib gəlib, Fransanın “Paris Sen-Jermen”i İngiltərənin “Nyukasl”ı ilə heç-heçə edib (1:1). Turnir cədvəlində birinci yeri pley-offa erkən yüksəlmiş (10 xal) “Borussiya” tutur. Sonrakı yerləri PSJ (7), Nyukasl (5) və Milan (5) tutur. Son turda "Borussiya" PSJ-ni qəbul edəcək, "Nyukasl" evdə "Milan"la qarşılaşacaq.