“Neftçi”nin futbolçuları “Hapoel”i üstələyəcəklərinə inanırlar

“Neftçi” klubu futbol üzrə Çempionlar Liqasında İsrailin “Hapoel” (Kiryat-Şmona) komandasını III təsnifat mərhələsində üstələmək şanslarını itirməyib. Lent.az-ın məlumatına görə, flaqmanın futbolçuları avqustun 8-də baş tutacaq cavab görüşü ərəfəsində iddialı danışıblar.

Yeni kapitan Sadiqov bildirib ki, ilk oyundakı 0:4 hesablı biabırçı məğlubiyyət komandasının mərhələ şansını azaldıb. Buna baxmayaraq, o, ümidlərini itirmədiklərini söyləyib: “Bilirik ki, 4 topun əvəzini çıxmaq çox çətindir, amma mümkündür. Bunu azarkeşlərimizin dəstəyi sayəsində bacara bilərik. Odur ki, azarkeşlərimizi stadiona dəvət edirəm. İstəyimiz odur ki, onlar bizi sonadək dəstəkləsinlər”.

Flavinyo isə deyib ki, İsraildə baş tutmuş ilk matçda nə baş verdiyini izah etmək çətindir: “0:4 hesabına bəraət qazandırmaq niyyətim yoxdur. Amma bu məğlubiyyətin əvəzini çıxmaq üçün gözəl şansımız var. Komanda olaraq ümidimizi itirməmişik və qələbəyə köklənmişik. Onu da deyim ki, “Hapoel” Kiryat-Şmona ilə cavab oyununda azarkeş dəstəyinə daha çox ehtiyacımız var. İnanıram ki, onlar bizi bu qarşılaşmada tək qoymayacaqlar və fürsətdən istifadə edib bütün neftçisevərləri bizi dəstəkləməyə çağırıram”.

Julius Vobayın fikrincə, İsraildəki 0:4 hesablı məğlubiyyət “Neftçi”nin mərhələ adlamaq şansını azaldıb. Lakin syerra-leoneli hücumçu qələbəyə kökləndiklərini söyləyib: “Əgər rəqib 4 qol vurubsa, biz niyə bunu bacarmayaq. Sadəcə daha kəsərli hücumlar təşkil edib müdafiədə diqqətli oynamalıyıq. Hamımız qələbəyə köklənmişik. Son dəqiqəyə qədər mübarizə aparıb qalib gəlmək istəyirik”.

Cavid İmamverdiyev isə “Hapoel”lə səfər matçında imkanlarından çox zəif çıxış etdiklərini boynuna alıb. Onun sözlərinə görə, müdafiədə buraxdıqları kobud səhvlər 4 qolla nəticələnib. Lakin İmamverdiyev məğlubiyyətlə barışmaq fikirlərinin olmadığını açıqlayıb: “Cavab qarşılaşmasında əlimizə düşəcək qol imkanlarından maksimum yararlana bilsək vəziyyəti xeyrimizə dəyişə bilərik. Azarkeşlərin də güclü dəstəyi ilə bunu bacaracağımıza inanıram”.

Qeyd edək ki, Bakının Mərdəkan qəsəbəsindəki “Dalğa Arena”da keçiriləcək “Neftçi” – “Hapoel” matçının start fiti saat 21:00-da çalınacaq.