Tərlan Kərimov 7-ci oldu-YENİLƏNİB

XXX Yay Olimpiya Oyunlarının ikinci günü Azərbaycan millisinin daha bir cüdoçusu Tərlan Kərimov (66 kq) tatamiyə çıxıb. Apasport.az saytının məlumatına görə, ilk mərhələdən azad olan həmyerlimiz 1/16 finalda rusiyalı Musa Moquşkovla qarşılaşıb.

Həmyerlimiz Bakı vaxtı ilə saat 14:12-də başlayan görüşdə qələbə qazanıb. Belə ki, döyüşün əsas vaxtında idmançılar hərəyə 1 yuko fəndi işlətdiklərindən qalib əlavə vaxtda müəyyənləşib. Burada isə ilk fənd işlədən İlqar növbəti mərhələyə adlayıb.

O, növbəti mərhələdə Əhməd Avad (Misir) ilə görüşüb. Həmyerlimizin rəqibi Humayd Aldereyi (BƏƏ) ipponla məğlub edib. Tərlanın ikinci döyüşü saat 15:36-da başlayıb. Həmyerlimiz bu rəqibinə də heç bir şans verməyərək 2 yuko xalı ilə qalib gəlib, 1/4 finala vəsiqə qazanıb.

Kərimov yarımfinala vəsiqə uğrunda ispaniyalı Suqoi Uriarteni tatamiyə dəvət edib. Lakin döyüş cüdoçumuz üçün uğurlu alınmayıb. Bundan öncə 2 yuko ilə qalib gələn Tərlan bu dəfə özü eyni hesabla uduzub.

Buna baxmayaraq, o yarışda mübarizəni davam etdirəcək. Təmsilçimiz çempionluqla vidalaşsa da, bürünc medal qazanmaq üçün təsəlliverici görüşlərdə qüvvəsini sınayacaq.

Tərlanın 3-cü yer uğrunda ilk rəqibi Pavel Zaqrodnik (Polşa) olub. O, rəqibinə vazari ilə uduzaraq, Olimpiadanı 7-ci yerdə bitirib.

Bundan əvvəl rinqə çıxan İlqar Müşkiyev (60 kq) isə çıxışını başa vurub. O, ilk görüşündəcə uduzub.